screaming realities

Ars Poetika
Allan Popa

Sa isang teorya sa pisika
walang anumang dalawang bagay
na maaaring ganap na magtagpo.
Mapipilit silang paglapitin
ngunit di kailanman mapagdidikit.

Laging may espasyong
papagitan sa kanila, gaano man
kakitid. Tulad ng mga paa
ng anghel na hindi sumasayad
sa lupa. Kaya tayo dumadama:
tinutulay ang pagkakahiwalay
upang humanap ng karamay
sa ating walang-hanggang pag-iisa.

sumasalat tayo ng kahulugan:
hibla-hibla ng kawalan na sinusulid.
hinahabi natin ang nadarama.
Ang mga katahimikan at patlang
sa pagitan ng bagay-bagay.

* Mula sa multiply site ni soleil.